Яшь барса да егетләр, без һаман да егетләр (дустыма багышлау)

Тамырларым белән береккән.

Минем каным ага җаным буйлап-

Әниемнән иңгән кендектән.

Үткән сукмакларым барлаганда,

Бөрчек- бөрчек нурым ялтырый.

Үткәннәрем - гомер дисбесендә,

Туарым да матур юл сорый.

Йә әйтегез, кемгә каршы төштем,

Кемнең юлын кистем аркылы?

Мине әйдәп барды тормышымда,

Өмет белән намус ялкыны!

Абынганым булды, күтәрделәр ,

Күтәрделәр ихлас дусларым.

Мин беләмен инде гомеремдә-

Фасылларым барын, яз барын.

Кесәм буш булганда тиеннәргә,

Мин өләштем соңгы саманым.

Тик сатмадым гомер юлларымда -

Дусларымны һәм дә иманым.

Әҗәл тоткан чакта якалардан,

Бары бер теләгем булгандыр-

Кайгыларда түгел микән туган,

Күршеләрем ,якын дусларым?

Менә шулай үтелгәндер гомер,

Гомерләрдә күкрәр сәгатьләр.

Ходай бүләк итте һәр көнемә-

Бары сөю һәм дә сәгадәтләр.

Гомер үлчәвендә басып торам,

Күрәм , шактый җыйган алтыным?!

Алтыннарым бүген сезнең алда -

Тулып торган олуг табыным!.

Исертәсең язмыш, кайтасың да,

Кайтасың да үткән елларга.

Төкерепләр багыйк барчасына,

Һава булган чакта суларга,

Чакырганда язмыш юлларга!

Сезнең алда, сәҗдә басып торам-

Дөнья шашар хисем агыла.

Кеше гомер үткәнендә яши,

Дәкыйк кылганына табына.

Мин бер кадир сезнең алдыгызда-

Бүген шулай тоям үземне.

Тик аңлагыз шуны. Көтмим эле,

Көтмим эле гомер көземне!

Вазыйх Фатыйхов