Мин бит тормыш баласы

Онытылып бар дөньядан,

Килә бер ял аласы.

Йоклыйсы иде сабыйча,

Мин бит тормыш баласы.

Онытылып, Мәҗнүн кебек,

Килә сөеп каласы.

Тик Ләйләне каян аласы? -

Мин бит тормыш баласы...

Онытылып, төштәгечә,

Килә күккә ашасы.

Түшәм баса маңгайларга, -

Мин шул тормыш баласы.

Онытылып, тәннәремнән

Килә җаным орасы.

Фани дөнья якын,

Ләкин

Мин бит тормыш баласы.

... Килә бүген исәрләнеп,

Хыялланып каласы.

Бәлкем, бар да чынга ашар,

Мин бит тормыш баласы...

Вазыйх Фатыйхов.

Фото yandex.ru