Тормышта уңышлы яшәү өчен нинди белем алырга?

Шушы көннәрдә агротехник техникум җитәкчесе Васил Төхвәтуллин белән әңгәмә кордык, аңа берничә сорау бирдем.

-Васил Юсуфович, техникум безгә нәрсә бирә?

-Беренче чиратта шуны әйтеп үтәсем килә, техникум ике юнәлештә - эшче һәм урта белгеч һөнәрен бирә. Беренче юнәлеш буенча пешекче һәм тракторист, икенчесендә бухгалтер һәм техник механиклар әзерлиләр.

-Укучыларны техникумга ничек җәлеп итәргә?

-Җитәкче булып эшли башлаганнан бирле бу мәсьәләне хәл итәргә тырышам. Үземнең беренче чыгышымда ук кадрлар куркынычсызлыгы техникумның яшәвеннән тора, без эшләмәсәк районда белгечләр дә калмаячак, дигән идем. Минемчә, бездә белем бирү дәрәҗәсе шәһәрнекеннән ким түгел, яхшырак дип тә әйтәсем килә. Түләүле югары уку йортларында укып күпме чыгым китәсен уйлап карагыз. Мин санадым, биш ел уку дәверендә бер миллион сум тирәсе акча сарыф ителә икән. Бу аз сумма түгел. Шуның кадәр чыгымны түгеп, укып бетергәннән соң ул бала кая бара? Кая карама белгечләр җитәрлек, ә эшче көчләр җитешми. Авыл хуҗалыгы таркалса да, тракторчы кирәкле һөнәр булып кала, юл төзү эшләрендә алыштыргысыз ул. Элек безгә яшьләр юл йөрү кенәгәсен алу өчен генә килә иде. Ә хәзер нәкъ менә тракторчы һөнәрен үзләштерү өчен укырга керәләр. Районыбыз әллә ни зур булмаса да, анда утыз алты җәмәгать туклану урыны бар. Аларга һәрчак пешекчеләр кирәк. Шәһәрнең өченче номерлы ипи пешерү заводына бездән пешекче-кондитерлар сорыйлар. Безнең укучыларыбыз кытай рестораннарында эшлиләр. Укытучыларыбыз тәҗрибәле, ике телне дә яхшы беләләр. Бер укытучыбыз-Наталья Володина Италиягә стажировка үтәргә барып кайтты. Аның тырышлыгы нәтиҗәсендә укучы кызларыбыз республика күләм ярышларда беренче призлы урыннарны яулыйлар. Анда сәүдә институтында укучылар да катнашалар бит. Егетләребез дә калышмый, конкурсларда еш катнашалар.

Бу язманың тулы вариантын газетабыздан укый аласыз.