Тормыш әнидән башлана [ФОТО]

Мөмкинлек булган саен без аның белән балалар бакчасына ашыгабыз, дус кызлары, яраткан тәрбиячеләре белән күрешәбез. Ә кичә Әниләр көненә багышланган бәйрәмгә чакырдылар безне.

"Березка" балалар бакчасының әзерлек группасындагы бәйрәм бик күңелле узды. Тәрбиячеләр Александра Гаврилова, Светлана Баранова, музыка җитәкчесе Елена Маслова аны күңел җылысын да кушып оештырганнар. Балалар яраткан әниләренә багышлап җырладылар, шигырьләр сөйләделәр. Милли киемнәр кигән кызларның татар биюен башкаруы гына да ни тора?! Карап туймаслык инде. Бәйрәмдә әниләр һәм балалар катнашында төрле уеннар да оештырылды. Әниләр күзләре бәйләүле килеш балаларының портретларын ясадылар, себерке белән шар кудылар, капчык киеп сикерделәр. Интеллектуаль марафон да булды. Бәйрәмнән һәркем күтәренке күңел белән таралды.