Караңгыда юлга чыкма

Статистика мәгълүматлары буенча һәр өченче авария тәүлекнең караңгы вакытында ясала. Күз күременең начар булуы, ә кайвакыт йончыган транспортчыларның йоклап китүе аркасында машиналар бәрелешәләр, юл кырыена төшеп авалар, җәяүлеләрне бәрдерәләр. Соңгы вакытта район территориясендә булган ике фаҗига дә тәүлекнең караңгы вакытында ясалдылар.
14 октябрь көнне 6 сәгать 15 минутта Казан-Оренбург юлының 78 нче километрында "МАЗДА" автомобиле шоферы Д.юл йөрү кагыйдәләренең 10.1 пунктын боза, ягъни юл хәрәкәте куркынычсызлыгын тәэмин итәрдәй тизлекне сакламый. Руль идарәсен югалтып каршы як хәрәкәт полосасына чыга һәм "Фольксваген Туарег" автомобиле белән бәрелешә. "МАЗДА" шоферы һәлакәт урынында, ә пассажир кыз Алексеевск район больницасында үлә. 5 кеше төрле авырлыктагы тән җәрәхәтләре алалар. Ни кызганыч, "МАЗДА" шоферы да, аның ике пассажиры да куркынычсызлык каешларын каптырмаган булалар. Шуның өстенә "МАЗДА" шоферы 2012 елда гына да юл йөрү кагыйдәләрен бозган өчен 8 мәртәбә административ җаваплылыкка тартылган була.
Ә менә "Фольксваген"ның пассажирлары да, йөртүчесе дә куркынычсызлык каешларын эләктергән булалар. Бу аларның гомерләрен саклап кала да инде.
Шул ук көнне 18.00 сәгатьтә Мәскәү-Уфа юлының 917 километрында "ГАЗ-2117" автомобилен йөртүче җәяүле С. ны бәрдерә. Ул фаҗига булган урында һәлак була. Бу фаҗигадә җәяүле гаепле дип фаразлана. Чөнки ул юл йөрү кагыйдәләренең 4.1, 4.6 пунктларын бозып машина йөри торган юлга чыга, киемендә яктылыкны кайтаручы элементлар булмый.
Бик зур ихтыяҗ булмаган очракта тәүлекнең караңгы вакытында руль артына утырудан тыелып торырга киңәш итәбез. Һәм әлбәттә, һәрвакыт куркынычсызлык каешын эләктерергә, балаларны махсус креслога утыртырга кирәк.

Реклама