Хатын-кыз йөртүче эзләүдә булган машинада ЮХИДИ хезмәткәрләреннән качып йөргән (+видео)

Казанның юл-патруль хезмәткәрләре эзләүдә булган кара төстәге Daewoo Nexia атомобилен күреп ала. Ләкин туктыйсы урында, руль артындагы хатын-кыз машинасының газына гына баса.

- Әлеге машина эзләүдә иде, - дип аңлатма биргән Казанның ЮХИДИ идарәсенең юл-патруль хезмәте полк командиры урынбасары Михаил Савин. - Патрульләштерү вакытында машина күреп алына һәм йөртүчесенә туктарга боерыла. Ләкин ул әмергә буйсынмый.

Артыннан куып барып, Nexia машинасын Нариманов урамында юл читенә кысалар. Руль артында 38 яшьлек хатын-кыз, салонда - 24 яшьлек якын дусты һәм 18 яшьтәге улы була. Ир-атларның өлкәнрәге хокук сагындагыларга каршылык күрсәтә.

- Инспекторларның берсе хастаханәдә ята, - дигән Савин. - Сыну һәм башка төрле җәрәхәтләре бар.

Кайбер мәгълүматлар буенча, кызу канлы ир-атның моңа кадәр дә хөкем ителгәне булган. Хәзер аны 9 елга кадәр ирегеннән мәхрүм итәргә дә мөмкиннәр. Ә инспекторлар фәрманына буйсынмаган хатын-кыз йөртүчене 800 сум күләмендә штраф көтә.