Яшь батырлар ачыкланды
Узган җомга көнне "Дельфин" спорт-сәламәтләндерү комплексында 1996 елгы һәм яшьрәк үсмерләр арасында татарча көрәш буенча балалар-яшүсмерләр спорт мәктәбенең ачык беренчелеге булып узды. Әлеге бәйгене менә өченче мәртәбә инде, бабасы-Кече Укмас авылыннан сугыш һәм хезмәт ветераны Фәйзрахман Нәбиулла улы Нәбиуллин истәлегенә Казан шәһәренең "Веста" идарәче компания җитәкчесе Алмаз Нәбиуллин үткәрә. Бәйгедә...
Ярышларны рәсми төстә район башлыгы Илһам Валеев ачты. Ул районда спортны, аерым алганда татарча көрәшне үстерүгә, яшьләрне патриотик рухта тәрбияләүгә зур өлеш керткәне өчен А.Нәбиуллинны Рәхмәт хаты белән бүләкләде. Алмаз да бүләкләрсез кайтмаган инде. Яшьләр сәясәте, спорт һәм туризм бүлегенә принтер тапшырды ул. Баш хөкемдар Рафыйк Мөхәммәтшин яшь көрәшчеләрне, тренерларны, хөкемдарларны ярышларның кагыйдәләре, тәртипләре белән таныштырды.
Яшь кенә булсалар да, бу көнне келәмгә чыккан үсмерләр арасында көрәш сөючеләргә, җанатарларга яхшы танылып өлгергәннәре, район республика күләмендә җиңүләр яулаганнары да бар иде. Келәмдә барган киеренке көрәш берәүне дә битараф калдырмады. Тамашачылар матур алымнар күрсәткән көрәшчеләрне кул чабып алкышладылар. Бигрәк тә ДЮСШ, Трой-Урай, Яңа Арыш мәктәпләре көрәшчеләре арасында чын татар көрәше алымнары күрсәтүчеләр күп булды. Көндәшләрен минутлар, секундлар эчендә чиста итеп аркаларына салдылар алар.
Трой-Урайдан Данис Миннебаев (36 кг. кадәр), Александр Фугин (55 кг.), Күгәрченнән Фаил Гарифуллин (40 кг.), Котлы Бөкәштән (Рәмзил Сәхабиев (45 кг.), Ямаштан Инсаф Баһавиев (50 кг.), Бәткедән Булат Хисмәтов (60 кг.), Яңа Арыштан Фәндүс Зарипов (65 кг.), Олы Елгадан Азат Хәйретдинов (70 кг.), ДЮСШтан Айназ Билалов (70 кг.дан югары) үз үлчәү авырлыкларында батыр калдылар.
Командалар арасында балалар-яшүсмерләр спорт мәктәбе көрәшчеләре (тренер Рафыйк Мөхәммәтшин) беренчелекне алдылар. Икенче урынга Күгәрчен командасы (Гамил Шәмсевәлиев) ия булды. Трой-Урай көрәшчеләре (Рәниф Мөхәммәтшин) өченче урынга чыктылар.
Көрәшчеләр ял иткән арада тәнәфесләрдә спорт бәйрәменә ямь өстәп "Кама йолдызчыклары" бию ансамбле, "Фламинго" аэробика группасы чыгыш ясадылар.
Җиңүчеләргә, призерларга Мактау грамоталарын, акчалата бүләкләрне ярышларның төп спонсоры Алмаз Нәбиуллин тапшырды.
Шунысы куанычлы, бу бәйге матур традиция буларак, районның спорт тормышында үз урынын алды. Аны хәзер көрәшчеләр дә, җанатарлар да һәр елны көтеп алалар. Быелгы бәйге дә зур оешканлык белән уздырылуы, татарча көрәшебезне бизәгән мизгелләргә бай булуы белән күңелләрдә озак сакланыр әле.
Рәсемдә: И.Валеев А.Нәбиуллинга рәхмәт хаты тапшыра; көрәш мизгеле.
