Күгәрчен авылы янәшәсендә заманча яңа технология нигезендә эшлиячәк ит комбинатына республикабызда гына түгел, Рәсәйдә дә тиңнәр булмаячак. Без биредә эшләрнең ничек баруы белән танышып кайттык.
Чиста кырда кыска гына вакыт эчендә калыккан заманча завод биналары сокландырып куя. Инде әнә ике катлы административ көнкүреш бинасы да төзелеп беткән. Монда бүген эчке эшләр генә калган. Җылылык системасын эшләтәсе, канализация, суүткәргеч сузасы бар. Бүлмәлә
рдә буяу, агарту, бизәү эшләре алып барыла. Әйтүләренә караганда монда 75 урынга тулай торак, ашханә һәм прораб, участок башлыклары бүлмәләре урнашачак. Әлегә төзелеш белән җитәкчелек итүче белгечләр аерым вагоннарда урнашкан. Без килгәндә көн инде кичкә авышып бара иде. Якты, җылы вагон эчендә төзелеш җитәкчеләре алда торган мөһим эшләр хакында фикерләшәләр. Алар барлык операцияләрнең да план нигезендә алып барылуын әйттеләр. Тик менә артык озакка сузылган көзге яңгырлар гына эшкә бераз тоткарлык ясаган. Хәзер инде бөтен көчне туплап шушы югалган вакытны кайтару өчен тырышалар. Кар-бураннар башланганчы ит заводының производсто цехы стеналарын җылытылган панельләр белән торгызу эше бара. Биредә кранчылар, эретеп ябыштыручылар һәм монтажчылар ялсыз диярлек эшлиләр.
-Бу цех 4800 квадрат метр мәйданны билиячәк. Салкын кыш көннәрендә әлеге производство бинасында эчке эшләр алып барылачак. Җылыту, җилләтү системаларын эшләү, канализация, сүткәргеч сузу һәм кирәкле җиһазларны урнаштыру кебек катлаулы операцияләрне башкарырга планлаштырабыз,-ди прораб-куратор Илмар Гаффаров.
Төзелештә барысы да график нигезендә алып барыла. Бүгенгесе көнне 6 бригада, 55 хезмәткәр эшли. Төзелеш өчен кирәкле, мөһим булган барлык материалларны кайтарып куйганнар. Бетон измәне дә күп төзелешләрдәге кебек читтән ташымыйлар, үзләрендә генә җитештерәләр. Бу цехта барысы 150 кубометр бетон эшләп чыгарыла. Соңгы заман рухында эшли белүче осталарның күбесе Ульян өлкәсеннән килгәннәр. Инде әкренләп үз районыбыз егетләре дә тартыла башлаган. Бүген инде монда Балык бистәсе, Күгәрчен, Олы Кульга авылларыннан берничә егет килеп хезмәт куялар. Эшләргә теләге зур булган ир-егетләргә бүген үк хезмәт күнекмәсе үтеп, конкрет участокта үзләрен күрсәтергә мөмкинлек бар. Белгәнебезчә, ит комбинатына эшче-хезмәткәрләрне урамнан җыймаячклар. Бар яктан да сыналган, олы төзелештә чыныгу үткән осталар булу мөһимрәк.
Иң мөһим һәм кызыклы язмаларны Татмедиа Telegram-каналында укыгыз
