Якты киләчәккә юл

Бу чыгарылыш мәктәп өчен аеруча үзенчәлекле, юбилей чыгарылышы. Моннан 20 ел элек мәктәпне беренче чыгарылыш сыйныф укучылары тәмамладылар. Шуңа да бәйрәм аеруча күңелле булды. Актлар залына ата-аналар, укытучылар җыелган иде. Йөзләренә дулкынлану бәреп чыккан. Кайберәүләренең күз яшьләре дә җемелди. Сәхнәдә аларның балалары. Сиздерми дә үсеп беткәннәр алар. Хәзер инде олы тормышка аяк басар вакытлары җиткән. Укучыларның шатлыклы елмаюлары артында дулкынлану сизелә. Балачак төгәлләнде, алда аларны нәрсә көтә? Киләчәкләре бәхетле булсын дип өметләнәсе килә.
-Сез безгә дә балаларыбыз кебек, 11 ел эчендә мәктәп сезнең икенче туган йортыгызга әверелде. Ә укытучылар кырыс тәрбиячеләр генә түгел, проблемаларыгыз һәм хыялларыгыз белән уртаклаша торган якын кешеләр булдылар,-диде мәктәп директоры Г.Зәйнетдинова. -20 ел эчендә мәктәпнең үз традицияләре барлыкка килде. Быелгы чыгарылыш сыйныф укучылары педагогларның һәм ата-аналарның йөзләренә кызыллык китермәсләр. Аларның киләчәге якты һәм бәхетле булыр дип ышанабыз. Ә хәзер бердәм дәүләт имтиханнарын уңышлы тапшырырга кирәк. Барыгызга да уңышлар, шатлык телим.
Тантаналы линейкага район башлыгы И.Валеев та килгән иде.
- Сезнең мәктәп районның мәгариф учреждениеләре арасында иң алдынгылардан санала,- диде ул.- Бу хакта соңгы еллардагы бердәм дәүләт имтиханнары нәтиҗәләре дә анык дәлиллиләр. Сез безнең горурлыгыбыз, башкаларга яхшы үрнәк. Быелгы чыгарылыш сыйныф укучылары да имтиханнарны уңышлы тапшырырлар дип ышанам. Сезнең планнарыгыз, хыялларыгыз, өметләрегезнең чынга ашуын телим. Хәерле юл! Сез-районның киләчәге!
Аннары И.Валеев балаларын лаеклы тәрбияләгәннәре өчен Мозохиннар, Демьяновлар, Клементьевлар гаиләләренә Рәхмәт хатлары, бүләкләр тапшырды. Ул мәктәпкә дә бүләк алып килгән.
Чыгарылыш сыйныф укучылары бәйрәм тамашасы әзерләгәннәр. Ул җырларга, шигырьләргә, шаяруларга бай булды. Аларны традиция буенча беренче сыйныф укучылары да котладылар. 10 елдан соң үзләренең соңгы кыңгырауларына чакырдылар. Чыгарылыш сыйныф укучыларының укытучылары, ата-аналары да изге теләкләрен җиткерделәр. Ә укучылар үз чиратларында яраткан укытучыларына чәчәк букетлары бүләк иттеләр.
Һәм, ниһаять, соңгы кыңгырау яңгырый. Аның шатлыклы да, моңлы да чыңы кайтаваз булып йөрде.
Рәсемдә: район башлыгы И.Валеев чыгарылыш сыйныф укучылары арасында.