Авыл офыклары
  • Рус Тат
  • Түбән Новгородта–Сабантуй

    Менә инде икенче ел рәттән районыбыздан рәсми делегация Түбән Новгород шәһәренең Сабан туенда катнаша. Безнекеләрне быел да күптәнге дуслар кебек бик җылы кабул иттеләр.

    Шунысын да билгеләп үтәргә кирәк, балыкбистәлеләр бәйрәмгә республика исеменнән дә килгән иделәр. Шуңа күрә аңа әзерлек югары дәрәҗәдә барды һәм чынлыкта да йөзгә кызыллык килерлек булмады. Сәнгать өлкәсеме, тәм-томмы, балыкбистәлеләрнең һәр "күчтәнәче" кунаклар күңеленә хуш килде, Сабантуйның чын бизәге булып торды.
    Әлеге бәйрәм Түбән Новгородның Канавин районы "1 май" шәһәр паркында узды. Бу урынны шәһәрлеләр иң яраткан ял урыннары саныйлар икән. Биредә нинди генә аттракцион, карусель һәм башка тамаша җиһазлары урын алмаган! Үткән шимбәдә исә парк Сабантуй аншлагында иде. Түбәнновгородлыларны бигрәк тә татар кухнясы: пирог, чәк-чәк, бәлешләре сокландырды. Алар тәм-томнардан авыз итеп кенә калмадылар, безнекеләрнең күчтәнәчләрен бик теләп сатып та алдылар.
    Концерт мәйданчыгында да халык гаҗәеп күп җыелган иде. Алдан биредәге татар диаспорасының үзешчән артистлары сәхнә тотты. Аннан инде күп сәхнәләрне тоткан Рәсәй күләмнәрендә танылган балыкбистәлеләр сәхнәгә күтәрелгәч тамашачы яңадан уянып киткәндәй булды. Төрле фестиваль, конкурс лауреатлары "Камские звездочки" балалар бию коллективы һәм Сергей Фалин, Раил Сөнгатуллин, Анастасия Тимофеева, Зөһрә Насыйпова, Гөлүсә Садриеваларның чыгышлары түбәнновгородлылар күңеленә аеруча хуш килде. Озакка сузылган концерт бары тик рәсми котлаулар вакытында гына бүленеп алынды. Сабантуй тамашачысын, кунакларны котларга кемнәр генә килмәгән иде. Россия Президенты исеменнән иң элек Түбән Новгород өлкәсенең баш федераль инспекторы С.Валенков котлап узды. Ул үзенең чыгышында ерак Себер шәһәрендә бу бәйрәмнең балачакта калдырган хатирәләре белән дә уртаклашты. Өлкәнең милли һәм эчке сәясәт мәсьәләләре буенча министры А.Мигунов исә Сабантуйның дуслык һәм хезмәт бәйрәме булуын, барлык милләтләрнең берләштереп торуын искәртеп үтте.
    -Татар халкы-талантлы һәм хезмәт сөючән халык,-диде үзенең чыгышында Түбән Новгород хакимияте башлыгы О.Кондрашов. Шундый югары дәрәҗәле килүләре һәм үзләренә булган олы хөрмәт өчен Балык бистәсе район башлыгы И.Валеев җитәкчелегендә килгән Татарстан кунакларына олы рәхмәт сүзләрен җиткерде. Ә Илһам Валеев исә үз чиратында түбәнновгордлыларга Татарстан Президенты Рөстәм Миннехановның сәламләү адресын укыды.
    -Безнең дуслык озак яшәр дигән өметтә калам һәм киләчәктә әле без бер-беребезне күп тапкырлар сөендерербез,-диде ул.
    Бәйрәмнең тантаналы өлешендә шулай ук Рәсәйнең һәм Түбән Новгород өлкәсенең дин әһелләре дә катнаштылар.
    Чын мәгънәсендә, өлкә Сабан туе бик югары дәрәҗәдә үтте. Сүз дә юк, аның бу биеклеккә күтәрелүендә балыкбистәлеләрнең дә өлеше аз булмады. Шуңадыр, безнекеләр төялгән автобуслар юлга кузгалып киткәндә дә хуҗаларның аларны алкышларга күмеп кул изәп калуы бер олы бәяләмәсе кебек тоелды миңа.




    Нравится
    Поделиться:
    Реклама
    Комментарии (0)
    Осталось символов: