Авыл офыклары
  • Рус Тат
  • Шагыйрьгә хөрмәт

    Әгәр үзе исән булса, бүген якташ шагыйребез Кадыйр Сибгатуллин якыннары, иҗатташ дуслары, райондашлары белән үзенең 70 яшьлек олы юбилеен билгеләп үтәр иде.

    Хәер, үз халкының мәнфәгатен кайгыртып, аның бәхетле киләчәге өчен борчылып иҗат иткән шагыйрьне якташлары әле дә онытмый. Әнә шуңа 18 ел элек, 52 яшендә арабыздан вакытсыз киткән шагыйрьне үзенә кабул иткән Кече Укмас авылы зиратына каләмдәш дуслары, якыннары бик күп җыелган иде.
    Бирегә ерак араларны якын итеп шагыйрьнең тормыш иптәше Фәния ханым Хамматова, Татарстан Язучылар берлегенең Яр Чаллы бүлеге җитәкчесе Вахит Имамов, шагыйрь Факил Сафин, Яр Чаллы педагогия институты доценты Дания Сибгатуллина, шәһәрнең туган якны өйрәнү музее хезмәткәре Роза Хәмидуллина, якташыбыз, журналист Хәбибрахман Шәфигуллин һәм башка бик күп кунаклар кайткан. Шагыйрьнең кабер өстенә муниципаль район башлыгы ярдәме белән мәрмәр таш куйганнар, яңа чардуган урнаштырганнар. Бәтке мәктәбе укучылары да кабер өстенә матур чәчәкләр утыртып су сибәләр, тирә-юньне чистартып тәртипкә китерәләр. Шагыйрьне олылап, якын итеп кайткан кешеләр алдында иң элек Кече Укмас мәчете имам-хатыйбы Хөсәен хәзрәт дога кылды. Шуннан соң муниципаль район башлыгы Илһам Валеев сүз алды.
    -Кадыйр абый бик хөрмәтле шагыйрь, үткен каләмле, тугры сүзле, гаделлек яратучы журналист иде. Аның күп фикерләре әле бүген дә үз актуальлеген югалтмый. Тирән мәгънәле, һәр сүзе күңелгә үтеп керерлек итеп яза алган шагыйрь гомере кыска булса да, аның иҗаты озак яшәр. Ул буыннан-буынга дәвам итәргә тиеш,-диде ул.
    -Кече Укмас авылы, Балык бистәсе, Чулман елгасы, туган ягының барлык матурлыгы Кадыйр Сибгатуллин иҗатында зур чагылыш таба. Татар халык әдәбиятында Хәсән Туфан белән янәшә куярлык бөек шәхес, олы шагыйрь иде ул,-дип искә алды иҗатташ дусты Вахит Имамов. Биредә шулай ук шагыйрьнең тормыш иптәше, иҗатташ дуслары үз чыгышларында аның белән бергә булган истәлекле вакыйгаларны күңелләрендә яңарттылар.
    Шуннан соң Яр Чаллы шәһәре делегациясе Балык бистәсе гимназиясендә Кадыйр Сибгатуллинның музей бүлмәсендә булдылар. Алар алдында 7 сыйныф укучылары чыгыш ясады. Язучылар, шагыйрьләр, галимнәр белән булган бу очрашу мәгънәле, тәэсирле үтте. Шагыйрьнең тормыш иптәше Кадыйр абыйның иң кадерле истәлекләрен, яңа нәшер ителгән, истәлекләр тупланган җыентык китапны музей җитәкчесе Асия Мифтаховага тапшырды. Укучылар да якташ шагыйребез иҗаты белән киләчәктә тагын да якыннанрак танышырга, шигырьләрен ятларга сүз бирделәр, шагыйрьнең якыннары белән элемтәне тагын да ныгытырга теләк белдерделәр.
    Рәсемдә: бер төркем кунаклар шагыйрь җирләнгән зиратта.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: