Авыл офыклары
  • Рус Тат
  • Күңел аклыгы

    Кышкы аклык гүя аның күңеленә күчкән. Сабый чактагы кебек кар йомарламы атып шаярасы, юктан да елмаясы килә. Юл читләрендә яткан бизәк-бизәк кар бөртекләре дә җемелдәшеп күз кыса: күрәсеңме, янәсе, без ерактан-балачактан килдек.

    Үз уйларына гаҗәпләнгәндәй елмаеп куя Әлфира. Кул сузымы ара тоелса да, сабыйлыктан соң җиргә 50 кыш килеп аны язлар, җәйләр алыштырган. Югыйсә, бар да бүгенгедәй кебек.
    Тәб.Чаллы авылында Газиз ага белән Хөснелбәнат апаның бишенче баласы-төпчек кызы булып дөньяга аваз сала ул. Сугыш елы михнәтләрен күргән, ачлы-туклы елларның авырлыгын иңнәрендә тойган ата-ана балаларын укыту, аларга үрнәк тәрбия бирү өчен тырышлыкларын кызганмыйлар. Әлфира да мәктәптә уку алдынгысы була. 8 сыйныфны гел бишле билгеләренә тәмамлаган кыз хыялларын тормышка ашыру өчен Казан медицина училищесына укырга керә. Белемгә омтылучанлыгы белән биредә дә сынатмый ул, үзлегеннән күп укый, дәвалау-профилактикалау методикасындагы яңалыклар белән даими кызыксына. 1980 елда училищены уңышлы тәмамлап туган ягына кайта һәм Котлы Бөкәш хастаханәсенә шәфкать туташы булып эшкә урнаша. Тырышлыгы белән коллективта хөрмәт яулый, ягымлы карашы белән үзен яраттыра шәфкать туташы. Җиде ел хезмәт куя ул биредә, бары 1988 елда гына район үзәк хастаханәсенә эшкә күчә.
    Энтузиазм, эшкә намуслы караш, игътибарлылык... аның характерындагы төп билгеләмәләр бу. Ак халатына, керсез күңеленә тап төшерми 30 елдан артык район халык сәламәтлеге сагында хезмәт куючы Әлфира Газиз кызы Хәсәнованың тырышлыгын күп төрле Мактау грамоталары, Рәхмәт хатлары бәяли. Алар арасында 2008 елда хезмәттәге уңышлары өчен ТР Сәламәтлек саклау министрлыгыннан һәм узган ел район хакимияте башлыгы тарафыннан тапшырылган Рәхмәт хатлары аның өчен иң кадерлеләре. Гомумпрактик дәвалау бүлегендә эшләгәнлектән, участок табибы Илсөяр Җамалиева белән Иске Арыш, Шумково, Олы Укмас, Балыклы Чүкәй, Трой-Урай авылларына да еш чыга алар. Өлкән яшьтәге һәм медпунктка килә алмаучы авыруларның өйләренә барып дәва билгелиләр.
    Район үзәгендәге бу участокка караган йортларда яшәүче, дәвалауга мохтаҗ карт-карчыклар янына барып уколлар ясау да шәфкать туташы вазыйфасында. «Куллары белән дәваландырса, ягымлы йөзе белән шифаландыра»,-диләр авырулар Әлфира Хәсәнова турында. Бу сүзләрдә хаклык бар.Чын күңелдән әйтелгән рәхмәт сүзләре исә җанга рәхәтлек өсти. Әти-әнисеннән сабырлыкны, намуслылыкны үзенә өлге итеп алган шәфкать туташына әле ул күп тапкырлар әйтелер, йөрәктән-йөрәккә күчәр.
    Ә табигатьтә янәдән кыш... Аның аклыгы җан пакълыгына, күңел сафлыгына тиң. Әлфира Газиз кызыХәсәнованың да 50 нче тапкыр каршы алынган кышларына тагын бик күп сөенечле язлар, бәрәкәтле җәйләр, мул көзләр өстәлсен иде.
    Рәсемдә: Әлфира Хәсәнова.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: