Авыл офыклары
  • Рус Тат
  • Канәгать калды...

    Татарстан Республикасы Дәүләт Советы рәисе Фәрит Мөхәммәтшин районыбызга рәсми визитын Качкалак авылындагы Камил Гобәйдуллинның фермерлык хуҗалыгыннан башлады.

    Аны биредә муниципаль район башлыгы Илһам Валеев белән күп кенә рәсми кешеләр каршы алдылар. Кунаклар иң элек фермерның терлекчелек бинасында булдылар. Бүген биредә 80 баш мөгезле эре терлек асрала. Аның 59 башы таналар. Шушы көннәрдә алар да инде бозаулый башлаячаклар.
    Дәүләт Советы рәисе фермердан бүгенге көндәлек эшләре, киләчәккә уй-планнары белән дә кызыксынды. Фермерлык хуҗалыгы киләсе елларда бар игътибарны сөт җитештерүгә юнәлтәчәкләре хакында әйткәч, Фәрит Мөхәммәтшин кечкенә авылны тернәкләндерү, үстерү өчен аларның бик яхшы гамәлләргә курс тотуларын хуплады. Сүз уңаеннан эшче-хезмәткәрләр белән тәэмин ителеш хакында да сораштырды. Качкалакка инде бүгеннән үк күрше-тирә авыллардан яшь гаиләләрнең күченеп килергә теләк белдерүләре шулай ук авылның перспективасы буларак кабул ителде. Фермерлык хуҗалыгы киләчәктә яшьләр өчен торак йортлар җиткезү һәм производство биналарын торгызу мәсьәләләренә зур игътибар бирәчәк. Ә аңа бу күркәм уй-планнарны тормышка ашыруда Казан шәһәрендә эшләүче райондашларыбыз ярдәм итәргә, үз инвестицияләрен кертергә теләк белдергәннәр инде. Әнә шуңа Камил Гобәйдуллин хезмәттәше Шамил Нәбиуллин белән берлектә биредә максатлы эш җәелдергәннәр. Фермерлык хуҗалыгы республикада яшь фермер буларак та дәүләт ярдәмен алган. Республика кунагы күргәннәреннән һәм сораштыруларыннан канәгать калды. Район фермерлары белән әңгәмә барышында Фәрит Мөхәммәтшин илебезнең бердәм сәүдә оешмасына аяк басуының өстенлекле һәм файдалы якларына тукталды.
    -Бүген инде элеккегечә күнегелгән ысуллар белән генә эшләргә кирәк түгелдер. Үзебез җитештергән продукциянең күрше-тирә регионнарга тәкъдим итәрлек дәрәҗәдә югары сыйфатлы булуы өчен тырышырга кирәк,-диде ул. Фермерларга бары тик экологик яктан чиста продукция җитештерүгә игътибарны күбрәк юнәлтергә зарурлыкны ассызыклап үтте. Очрашу барышында ул район фермерларының күп санлы сорауларына җавап бирде, үз киңәшләрен җиткерде. Качкалак җирлегендә узган бу очрашудан соң ТР Дәүләт Советы рәисе Фәрит Мөхәммәтшин муниципаль район Советының 25 нче утырышында катнашты.
    Рәсемнәрдә: ТР Дәүләт Советы рәисе Фәрит Мөхәммәтшин фермерлык хуҗалыгындагы очрашуда.

    Нравится
    Поделиться:
    Реклама
    Комментарии (0)
    Осталось символов: