Европадан туклану продуктларына чикләүләр кертелү сәбәпле видеокиңәшмә үткәрелде
Чикләүләр безне куркытмый, үзебезнеке җитә.
Татарстан авыл хужалыгы министрлыгы үткәргән видеокиңәшмәдә районнарда урып-җыю эшләренең барышы һәм халыкны азык-төлек продуктлары белән тәэмин итү мәсьәләләре хакында сүз барды.
Министрның беренче урынбасары Николай Титовның әйтүенә караганда, күп районнарда коры һава шартлары саклана. Әмма урып-җыю нәтиҗәләреннән күренгәнчә, узган елдагыга караганда уңыш чыгышы сөенерлек. Республиканың азык-төлек базарында да Европа илләре чикләү игълан иткәннән соң, товар җитешмәү сизелми. "Республикабызда быел ипи бәяләрендә дә үзгәрешләр булмаячак. Чөнки икмәк промышленносте өчен 270 мең тонна бодай, 50 мең тонна арышны читтән кертмичә, үзебездә җитештерелгән ашлык хисабына тулыландырачакбыз. Яшелчә, җиләк-җимеш, ит-сөт продуктларына да кытлык булмаячак. Без үз халкыбызны үзебездә җитештерелгән продуктлар белән тәэмин итә алабыз",-диде ул.
Видеокиңәшмәдә Европа илләре тарафыннан кайбер туклану продуктларына чикләүләр кертелү сәбәпле, Норвегия балыгыннан, Испания итеннән, Италия сөт продуктларыннан, Польша алмасыннан башка кышны ничек чыгарбыз, дигән сорау да яңгырады. Кайбер журналистлар министр урынбасарыннан үз вакытында гөрләп эшләгән Масловка совхозы алмасыннан башка базар киштәләрен тулыландыру өчен үзебездә нинди эшләр башкарылуы белән кызыксындылар. Җаваптан күренгәнчә, әлегә борчылырлык урын юк. Чит илләрдән ит, сөт, яшелчә, җиләк-җимеш продуктларын ташымыйча да, үзебездә җитештерүне арттыру хисабына базарны тулыландыра алачакбыз, дигән җавап һәркемнең күңеленә хуш килде. Аннары шунысын да искәртү урынлы булыр, бүген шәһәр базарларында сатыла торган продукция бәяләре читтән кертелгәнгә караганда күпкә арзанрак, сыйфатлырак һәм экологик яктан куркынычсыз булуы исбатланган чынбарлык. Норвегиядән диңгез балыклары кертелмәве берәүне дә борчымый. Алар урынына үзебезнең сулыкларда үстерелгән корбан, сазан, судак балыклары күпләп сатуга чыгарыла башлады. Кама Тамагы бакчасында үстерелгән алмалар да Польшаныкыннан бер дә ким түгел. Яшелчә белән дә без үз-үзебезне тулысынча тәэмин итә алабаз. Республика хуҗалыклары елның-елында сәүдә нокталарына 30 мең тонна яшелчә үстереп озата. Республика авыл хуҗалыгы министрлыгының җаваплы хезмәткәрләренең әйтүенә караганда, эре авыл хуҗалыгы предприятиеләре һәм фермерларыбыз тарафыннан җитештерелгән продукцияне көзге ярминкәләрдә шәһәр халкы яратып алып бетерәләр. Димәк, халык өчен борчылырга нигез юк. Корылыктан зыян күргән кайбер районнарга Рәсәйнең башка регионнарыннан авыл хуҗалыгы продуктларын кертүгә килешүләр төзелә башлаган инде.
Фото yandex.ru
Иң мөһим һәм кызыклы язмаларны Татмедиа Telegram-каналында укыгыз
