Эшләре көйле бара

Бай тарихы булган май заводы бүген районыбызда гына түгел, республика күләмендә экологик яктан чиста продукция җитештерүе белән нык популярлашты. Ә кыш айларында исә алар сыр, май, эремчек ише продуктлар җитештерүне туктатып торалар.
-Республикабызда савым сыерларының баш саны кимегәнлектән, без үзебез дә кабул иткән сөткә беренчел эшкәртү үткәреп, аны Казан һәм Яр Чаллы кебек шәһәрләрдәге иң эре май заводларына озатырга мәҗбүр булабыз. Ә инде май аеннан мул сөт чоры башлангач, продукцияне үзебездә җитештерәчәкбез,-ди сөт-май комбинаты директоры Камил Садыйков.
Ә менә соңгы елларда районыбызда сөт җитештерүнең артуы күзәтелә. Бу елның ике аенда гына да комбинатка хуҗалыклардан, фермерлардан һәм авыл халкыннан 734,4 тонна сөт кабул ителгән. Бу узган елдагыдан 102 процентка артык. Март аеның беренче ункөнлегендә дә сөт узган елдагыдан күп килгән. Комбинатта аны бик җентекләп тикшереп кабул итәләр. Тәҗрибәле лаборантлар Кадрия Кәлиева белән Фәимә Гыйлаҗеваның әйтүләренә караганда, хуҗалыклар хәзер продукцияне суытып, яхшы, югары сортлы итеп тапшырырга тырышалар. Әнә, бу елның ике аенда кабул ителгән сөтнең 92 проценты югары сыйфатка ия. Бары тик калган 8 проценты гына механик чүпле булганга, икенче сорт белән бәяләнгән. Ә инде сөт югары сорт таләпләренә туры килгәндә, аның бәясе дә яхшырак була. Әнә, быел гына да сөт тапшыручыларга завод 7 миллион 649 мең сум акча түләгән. Бүгенгесе көнне сөт-май комбинатының хәзерләүчеләргә бурычлары юк. Бәлки шуңададыр, авыл җирлекләре һәм гаилә фермаларының күбесе үз продукцияләрен бирегә тапшыралар.
Бүген монда мул сөт тапшыру сезонына әзерләнә башлаганнар. Ул елның-елында май башларында старт ала. Әнә узган елгы сезонда да комбинат 86 миллион 534 мең сумлык продукция җитештергән. Биредә эшләнгән 172,5 тонна майны сәүдәгәрләр көтеп алганнар. Хезмәт сөючән коллективның бу елга да планнары зурдан. Сөт продуктларын эшкәртүдән тыш әле коллектив транспорт хезмәте күрсәтеп тә шактый зур табыш алуга ирешә. Предприятиенең ике "КамАЗ"ы узган ел район хуҗалыкларына хезмәт күрсәтеп 11 миллион сумнан артык керем китергән.Монда барысы да бердәм көч, зур тырышлык белән табыла. Тагын иң куандырганы, бердәм, уртак уй, матур теләкләр белән яши коллектив.
Рәсемдә: Фәимә Гыйлаҗева, Кадрия Кәлиева.
Автор фотосы.