Котлы Бөкәш авыл җирлегендә "Чаллы" крестьян-фермерлык хуҗалыгы үз зонасында гына түгел, район күләмендә иң ышанычлы һәм өметле эшләүчеләрдән исәпләнә.
Биредә инде күптәннән язгы кыр эшләренә хәзерлек күрәләр. Булган техника, агрегатлар яңартыла, запас частьләр кайтарыла, ягулык-майлау материаллары, югары сортлы чәчүлек орлык хәзерләү чарасын күрәләр. Язның бер көне ел туйдыра, дигәндәй, кызу эш вакытында һәр тарафта зур җанлылык хөкем сөрә бит. Быел крестьян-фермерлык хуҗалыгы эшчәннәренә исә икеләтә тырышлык, зур хезмәт куярга кирәк булачак. Элеккеге чорлардагы кебек азык-төлек промышленносте өчен яраклы ашлык җитештерү генә түгел, фураж запасын, мул итеп печән туплауны да онытырга ярамый. Чөнки биредә мөгезле эре терлек, сарыкларның баш саны да елдан-ел артып тора. Шуңа бүген монда һәр тармакта киеренке эш кайный. Фермерның гаилә фермасында булганда хуҗалык җитәкчесе урынбасары Дамир Ногманов "КУН-10" агрегаты белән терлекләргә печән, салам, сенаж ташучы механизатор Илфат Гыйззәтуллин белән таныштырды.
-Бу егетебез безнең ел әйләнәсе эштән бушамый. Кышын да, җәен дә производствода алгы сафта бара. Кыр эшләрендә иң тәҗрибәле чәчүче буларак, ул елның-елында мактала. Быелгы чәчүгә дә инде күптәннән әзерлек чарасы күрде,-диде ул.
Илфат исә шушы төбәктән, Тәб.Чаллы авылында туып үскән. Фермерлык хуҗалыгы җитәкчесе Илдус Шакиров белән бер сыйныфта укыганга, аңа ышаныч та зурдан. Егет һәр елны хезмәттәше, бай тәҗрибәле механизатор Василий Федоров белән ярышып эшлиләр. Биредә дистә елга якын ул әнә шулай игенче хезмәтенең барлык нечкәлекләрен белеп, өйрәнеп технологик таләпләрне төгәл үтәп эш итә. Ә соңгы вакытларда исә технологияне нәтиҗәле файдалану аеруча әһәмиятле. Чөнки ул югары уңышның нигезе булып тора. Яхшылап эшкәртелгән туфракка күңел җылысын биреп иңдерелгән орлык һәрвакыт матур, тигез булып тишелеп чыгалар. Ә яхшы, мул уңыш исә бүген тотрыклы яшәү мөмкинлеге бирә. Уңган игенче үзенең буш вакытларын да файдасыз үткәрми. Кыр эшләрендә катнашасы агрегат, җайланмаларны күздән кичерә. Бер ишеләрен төзекләндереп көйләргә дә вакыт таба. Әнә шулай һәрвакыт эштә ул. Көндәлек хезмәте ничек кенә киеренке, тыгыз булса да, буш вакытының бер минутын да файдасызга үткәрми. Кайберүләр кебек көн үтте, ярар дип тә өенә ашыкмый. Аз гына буш вакыты булды исә, тракторын карый, майлый, ныгыта. Бу гамәлләре белән ул быелгы язгы чәчүдә дә югары нәтиҗәләргә ирешергә исәп итә. Хуҗалыкта һәр елдагыча арпа, бодайдан тыш, солы, борчак, терлек азыгы культураларын игүгә быел зур урын бирергә исәп итәләр. Күп хезмәт таләп итә торган катлаулы операцияне очраклы механизаторларга йөкләп булмый бит. Шуңа Илфат бүгеннән үк чәчүгә әзерлек чарасын күрә.
Иң мөһим һәм кызыклы язмаларны Татмедиа Telegram-каналында укыгыз
