Матур гадәткә кергән киң массалы чаңгы ярышы быел Чулман елгасы өстендә үтте. Аңа район үзәгеннән һәм авыллардан меңнән артык спортчы җыелды.
Чулман яры буе Сабан туеннан бер дә ким түгел иде. Район үзешчәннәре берсеннән-берсе күңелле, дәртле музыка белән килгән халыкның күңелен күрде. Биредә шулай ук тәм-томнар, кайнар чәй белән дә сыйланырга мөмкин булды. Чаңгычылар һәм җанатарлар ярыш башлануын түземсезлек белән көтеп алдылар. Ә чаңгы ярышында катнашучылар яшьләренә карап төркемнәргә бүленеп көч сынаштылар. Ниһаять, стартка команда яңгырады. Йөзләгән чаңгычылар алга омтылдылар. Әлбәттә инде иң алда һөнәри белемле спортчылар йөгерә. Шулай да бу бәйгедә җиңү яулау гына түгел, ә массалы походта һәркемнең актив катнашып сәламәтлеген ныгыту да үзмаксат булып торды.
Исәпле минутлар тиз үтә. Инде финишка килүче җиңүчеләр дә билгеле булды. Хөкемдарлар ярышта катнашучыларның нәтиҗәләрен чыгарган вакытта, бәйрәмгә килүчеләр үзара аралашып фикер алыштылар, пилмән, шашлык белән сыйландылар. Сәхнәдә чыгыш ясаучы үзешчәннәр бер-бер артлы алышына торды.
Йомгаклау тантанасын муниципаль район башлыгы Илһам Валеев ачып җибәрде.
-Быелгы бәйрәм бик күңелле үтте,-диде ул. Чаңгычылар өчен яхшы урын сайлап алынды. Кәефләр күтәренке, алдан заказ биргәндәй кояш та алсу нурларын сибә. Бигрәк тә кулларына чаңгы тоткан ветераннарны һәм нәни спортчыларны күрү күңелле. Көчле алкышлар астында район башлыгы җиңүчеләргә акчалата бүләкләр һәм грамоталар тапшыра. Бәйгедә катнашучы иң өлкән чаңгычы Сөләйман Гыйзетдинов белән иң нәни спортчы Күгәрчен авылыннан 6 яшьлек Адилә Мингарипова да район җитәкчесе кулыннан бүләкләр алды. Тантана тәмамланса да, җыелган чаңгычылар тиз генә таралырга ашыкмадылар. Бәйрәм хозурында аралашулар дәвам итте.
Рәсемдә: старт мизгеле.
Иң мөһим һәм кызыклы язмаларны Татмедиа Telegram-каналында укыгыз
