“Бу кешеләр район тоткасы”

Бу конкурс безнең районда традицион рәвештә үткәрелә. Һәм балыкбистәлеләр арасында популярлык казанды. Бу көнне дә тамашалар залы тулы иде.
-Бүген сәхнәгә төрле һөнәр һәм социаль статустагы кешеләр чыгачак,-диде бәйрәм тантанасын ачып район башкарма комитеты җитәкчесенең социаль мәсьәләләр буенча урынбасары Р.Хәбибуллин. -Әмма аларны хезмәт сөючәнлек, шәфкатьлелек кебек кешелек сыйфатлары берләштерә. Мондый кешеләр район тоткасы.
Бу конкурста номинацияләр күп. "Өченче яшь героинясы" номинациясендә Яңа Сала авылыннан Исламия Шәфигуллинаны тәбрикләделәр. Ул 6 малай тәрбияләп үстергән. Өлкән яшьтә булуына карамастан, көче дә, дәрманы да бар әле. Тамашачыларга тальян гармунда уйнап күрсәтте ул. "Минем язмыш-минем һөнәр" номинациясендә ООО "Азык-төлек корпорациясе" сыер савучысы Гөлнур Гәрәева, "Хатын-кыз-ана" номинациясендә Күгәрченнән Фидания Гыймадиева, "Хатын-кыз-сыйныф җитәкчесе" номинациясендә Зур Мәшләк мәктәбе укытучысы Кадрия Шәмсевәлиева, "Хатын-кыз-эшмәкәр" номинациясендә Анатыштан Наталья Талакова җиңү яуладылар. Ә "Хатын-кыз-мәдәният һәм рухилык" номинациясендә балалар сәнгать мәктәбе директоры Елена Фәсхетдинова һәм Кызыл Йолдыз урманчылыгы клубы директоры Лариса Кибякова җиңүчеләр булып танылдылар. Алар шулай ук концерт номерлары белән чыгыш ясадылар. Шомбыт ФАП фельдшеры Нина Бирюкова "Хатын-кыз-ел үрнәге" номинациясендә җиңде. Бу хатын-кызлар үзләренең игелекле эшләре белән балыкбистәлеләргә яхшы таныш. Алар турында район газетасы да язды.
Тамашачылар үз номинацияләрендә җиңгән ир-егетләрне аеруча кызыксынып каршыладылар. ООО "Квант" директоры Фәнис Сибгатуллинны күпләр белмидер дә әле. Шулай да бу яшь эшмәкәр хәйрия эшчәнлеге белән актив шөгыльләнә, төрле акцияләрдә катнаша. Мәсәлән, 2011 елда бер төркем инициативалы кешеләр белән ул 500 меңгә якын акча җыеп онкологик авырудан интегүче балаларга һәм аеруча мохтаҗларга җибәрде. Аның "Ир-ат-игелекле йөрәк" номинациясендә җиңүе очраклы хәл түгел инде. Ә менә "Ир-ат-лидер" номинациясендә җиңгән фермер Раиф Хәмидуллинны районда гына түгел, республикада да яхшы беләләр.
Бәйрәм кичәсендә җиңүчеләр адресына бик күп җылы сүзләр әйтелде, концерт номерлары башкарылды. Балык бистәсе җире мондый игелекле кешеләрне тагын да күбрәк тудырсын иде.
Рәсемдә: Фәнис Сибгатуллин.