Авыл офыклары
  • Рус Тат
  • Бүген кунакта–алар...

    Традицион инвалидлар декадасы физик мөмкинлекләре чикләнгән кешеләрнең иҗат фестивале белән район Мәдәният йортында башланып китте.

    Бу көннәрдә һәрдаим ярдәмгә, кайгыртучанлыкка мохтаҗ булган кешеләр игътибар үзәгенә алыналар. Кызганычка каршы алар безнең районда да аз түгел. 3 меңнән артык балыкбистәленең сәламәтлек буенча физик мөмкинлекләре чикләнгән. Шулардан 113 бала һәм 86 коляскалы инвалид. Аларның күбесе рухларын төшермиләр, көчләреннән килгәнчә районның җәмәгать, мәдәни-социаль тормышында катнашалар, иҗат белән шөгыльләнәләр. Бу фестиваль моны тагын бер кат исбатлады.
    Район Мәдәният йорты фойесында инвалидларның декоратив-кулланма иҗат күргәзмәсе оештырылган иде. Анда Л.Мозохина, В.Букин, Р.Фәттахова, Т.Потапова, А.Кильянова кебек танылган осталарның эшләре куелган. Алар арасында агачка уелган, бисер белән үрелгән, бәйләнгән, чигелгән әйберләр дә бар. Янәшәдә генә балалар иҗат үзәге хезмәткәрләре үз куллары белән берәр нәрсә ясарга теләүчеләр өчен мастер-класс үткәрәләр. Район социаль яклау бүлеге кунакларга коймак, чәй тәкъдим итә.
    -Район үзәгендә "Доступная среда" дәүләт программасы уңышлы тормышка ашырыла,-ди социаль яклау бүлеге начальнигы А.Вафина. -Барлык дәүләт һәм муниципаль учреждениеләр пандуслар белән җиһазландырылган. Алар район үзәгенең ике мәктәбендә дә бар. Моннан тыш коляскалы инвалидлар яши торган 4 күпфатирлы йортларга да пандуслар куелган. Тиздән светофор янындагы җәяүлеләр кичүенә сукырлар өчен тактиль плиткалар җәеләчәк. Инвалидлар өчен уңай шартлар тудыру юнәлешендә эшләр күп әле. Иң мөһиме, аны даими рәвештә максатчан алып барырга кирәк.
    Шул арада инвалидларның иҗат фестивале-концерт башланды. Саулыклары, тормыш хәлләре әллә ни мактанырлык булмаса да, алар кешеләрне иҗатлары белән куандыралар. Бу көнне кемнәрдер җырладылар, шигырьләр сөйләделәр, икенчеләре музыкаль инструментларда уйнадылар. Тамашачылар аларның талантларын, тырышлыкларын югары бәяләделәр, алкышларны жәлләмәделәр. Фестивальдә катнашучыларның берсе дә бүләксез калмады. Районда инвалидлар декадасы уңышлы старт алды.
    Рәсемдә: район Мәдәният йортында.

    Нравится
    Поделиться:
    Реклама
    Комментарии (0)
    Осталось символов: