Авыл офыклары
  • Рус Тат
  • Берәүләр җыештыра, икенчеләр нидер көтә

    Районда санитар-экологик икеайлык дәвам итә. Аның барышын махсус рейд бригадалары даими күзәтеп торалар.

    Кар эрегәч әйләнә-тирәбездә кыш айлары дәвамында җыелган чүп-чарлар пәйда булды. Безнең тәртипсезлегебез, шапшаклыгыбыз турында сүз куертып тору урынсыз булыр, әлбәттә. Ничек кенә булмасын, чүп-чарны үзебезгә җыярга туры киләчәк. Күпчелек балыкбистәлеләр чисталык, тәртип урнаштыруга җаваплылык белән алындылар. Район үзәгендәге мәйданнар, скверлар чистартылды да инде. Клумбалар, чәчәклекләр дә тәртипкә китерелде. Санаулы көннәр эчендә поселогыбызның үзәге, күпчелек урамнары, йорт яны, оешма территорияләре чистарып, матурланып калдылар. Әмма бөтенләй җыештырылмаган, кеше кулы тимәгән урамнар, территорияләр дә бар шул әле. З.Шәймарданов урамы буйлап сузылган тротуар тирәләрендә кәгазьләр, пластик шешәләр, целлофан пакетлар һәм башкалар аунап яталар. Ә 39 номерлы 4 фатирлы йорт янәшәсендә картон калдыкларына тап булдык. Бу йортларда яшәүчеләр белән аңлату эшләре алып барылды, әлбәттә. Алар чүп-чарны җыештырырга вәгъдә бирделәр. Поселокны төзекләндерү кагыйдәләрен бозган өчен штрафлар да аз түгел. Аның күләме 2 мең сумнан башлана. Күбебез өчен шактый зур сумма булган акчадан колак какканчы, үз йортларыбыз тирәсендә тәртип урнаштыру арзангарак төшәр, әлбәттә. Октябрь урамындагы йортларда яшәүчеләр үз территорияләрен чистартканнар, җыештырганнар. Ә менә 25 В йортында яшәүчеләр йорт яннарын тәртипкә китерү турында уйламаганнар да.
    Чүп-чар белән тулган контейнерларга да тап булды рейд группасы. Аларда агач ботакларыннан алып иске диван, суыткычларга кадәр тутырганнар.
    -Бервакыт без контейнер мәйданчыгында 28 төрдәге чүп-чар санадык,-ди ООО "ЖКХ Слобода" начальнигы Ю.Темячев. -Бүгенге вакытта район үзәгендә 3 чүп ташу машинасы эшли. Шулай да контейнерларны чистартырга өлгерә алмыйлар. Хәзер санитар-экологик икеайлык барганда чүп-чар берничә мәртәбәгә артты, әлбәттә.
    Әмма зур габаритлы көнкүреш калдыклары безнең эшкә зур тоткарлык ясыйлар. Район үзәгендә үрнәк чисталык, тәртип урнаштыру өчен өстәмә рәвештә 35-40 контейнер мәйданчыгы җиһазларга, 120-150 контейнер алырга кирәк.
    -Һәр кибет янында чүп-чар өчен урналар булырга тиеш,-дип сүзгә кушылды поселок Советы башкарма комитеты белгече С.Прохоров. -Ә төзелеш материалларын йорт янына ташып өйгәндә поселок Советы белән килештерергә кирәк. Төзелеш яхшы эш, әмма ул поселокның төзеклегенә зыян салырга тиеш түгел.
    -Агач ботакларын, эре чүп-чарны чыгару өчен махсус транспорт булдыру турында уйларга кирәк. Ул билгеләнгән көннәрдә район үзәге урамнары буйлап үтсә, яхшы булыр иде,-ди өлкән участок уполномоченные Ю.Волкова. -Моның өчен махсус трактор яллау шактый кыйммәткә төшә шул. Ә ботакларны ваклап күмеп куярга иренәбез.
    Айлык дәвам итә. Рейдлар да даими үткәреләчәк. Күңелсез хәлдә калмас, штрафлар түләмәс өчен үз йортларыбыз, оешмаларыбыз тирәсендә тәртип урнаштырыйк.
    Рәсемдә: контейнерлар янында.

    Нравится
    Поделиться:
    Реклама
    Комментарии (0)
    Осталось символов: