Бердәмлек зур көч
Район авыл хуҗалыгы идарәсе башлыгы урынбасары Рафаэль Мөхәммәтшин һәм икътисад буенча баш белгеч Рөстәм Сәлахов белән район хуҗалыклары буенча йөргәндә "Азык-төлек корпорациясе"нең ферма янәшәсендәге азык утарына килеп чыктык.
Биредә инде сенаж салуны һәм беренче чабылыштан печән әзерләүне төгәлләп киләләр иде. Бу эшләр белән җитәкчелек иткән бригадир Илһам Ишмөхәммәтов эшне зур оешканлык белән алып баруларын белдерде. Хәер, аны монда башкарылган нәтиҗәләрдән күреп тә бәяләргә мөмкин. Хуҗалык районда беренчеләрдән булып төрле үләннәрдән яхшы сыйфатлы сенаж салган. Бу эшне монда тәүлек буена диярлек туктатмыйча алып барганнар. Кырдан «МТЗ-1221» тракторлары белән яшел массаны Рәис Гәрәев, Вәкил Кәримов һәм "КамАЗ"чы Фәнил Сибгатуллин ташып торганнар. Ә базда аны тракторчылар Юныс Мөхәммәтрәхимов, Илһам Ситдыйков, Марс Шәмсевәлиев тыгызлап таптатканнар. Бер үк вакытта монда сенаж салганда кирәкле концентратларны да кушарга онытмаганнар. Табигать кырыслыкларын да истән чыгармыйлар егетләр. Инде күрше район болыныннан, ерганаклардан шактый гына күләмдә рулонланган печән кайтарып өйгәннәр. Ә азык утарында барысы да исәпле. Аның һәр килограммын үлчәп кабул итеп урнаштырганнар. Вакыты шундый, диләр егетләр. Хуҗалык бригадиры үз күзәтүләре белән дә уратаклашты. 200 гектар мәйданны биләгән күпьеллык үлән җиреннән 2010 елгы корылыклы елда 1003 рулон печән кайтарган булсалар, узган ел шушы мәйданнан явым-төшем мул булгач, 3000 рулон печән җыелган. Быел да азыкның һәр бөртеге кадерле. Иң куанычлысы, киләчәкне дә күз уңында тотып эшлиләр. Әнә ферма янәшәсендәге 100 гектарлы арыш кырына үз көчләре белән быел 6000 тонна органик ашлама чыгарганнар. Эштә шушы ук тыңгысыз, уңган механизаторлар зур өлгерлек күрсәткән. Куәтле тракторда эшләүче Юныс Мөхәммәтрәхимов тирес төяп торган. Ә аны Т-150 тракторчысы Илһам Ситдыйков, МТЗда Вахит Хафизов, Галимҗан Галимов ташып торганнар. Ашлаган җир аш бирә, дип хак әйтә халык. Яңаарышлылар монда елның-елында мул уңыш алырга өлгерә. Иң элек малларны ашаталар, ә көзен яшел массаны силоска салалар. Кыскасы, җәйге матур көннең кадерен белеп эшлиләр алар. Юлдашларым Рафаэль Мөхәммәтшин белән Рөстәм Сәлахов та бүген монда 200 гектарлы күпьеллык үлән җиреннән авыл кешеләренә һәм эшче-хезмәткәрләргә рулонлап печән таратуларына уңай бәя бирделәр. Чыннан да, "Азык-төлек корпорациясе"ндә хезмәт кешесенә кадер, хөрмәт зур.
Рәсемнәрдә: механизатор Юныс Мөхәммәтрәхимов; азык утарында эш тәмамланды.
Иң мөһим һәм кызыклы язмаларны Татмедиа Telegram-каналында укыгыз
