Бала күңеле олуг җан...
Язмыш җилләре кешене кайларга гына илтеп ташламый. Яшьлек дәртләре ташып торган егет-кызларыбыз да тормыш сынауларын уңышлы үтеп халкыбызга игелекле хезмәт күрсәтәләр.
Бүген Олы Елга авылының "Умырзая" балалар бакчасы мөдире Минзия Шәйдуллинаны авылыбызда гына түгел, районыбыз авылларында да яхшы беләләр. Чөнки кыска гына вакыт эчендә ул үзе җитәкләгән коллективны алдынгылар сафына чыгарды. Әле дә күп төбәкләрдән бирегә тәҗрибә уртаклашырга, коллективның эш алымнарын өйрәнергә бик күпләр киләләр. Аңа моның өчен шактый күп көч, тырышлык куярга, йокысыз төннәрен калдырып әзерлек чаралары күрергә туры килгән.
Минзия үзе күрше Лаеш районының Пәрәү авылыннан. Әтисе Әхәт абзый белән әнисе Зәнфирә апаның бер-бер артлы дөньяга килгән 3 улларыннан соң бик көтелгән сөекле кызлары ул. Төпчек бала гаиләдә гадәттә иркә, көйсез була диләр. Әмма ул боларның капма-каршысы. Әти-әнисенә, ир туганнарына карата шәфкатьле, миһербанлы булып, барысына да үз тырышлыгын куеп булдырырга омтылуы белән үзгә ул. Мәктәптә дә эшчән, пөхтәлекне яратуы белән аерылып торган. Беренче сыйныфтан ук актив бала, пионер, комсомол сафларында тәрбияләнгәндә дә әйдәүче буларак һәм яхшы укуы белән иптәшләреннән өстен торган. Әнә шуңа мәктәпне тәмамлагач та кабул итү имтиханнарын уңышлы тапшырып, ул югары уку йорты студенты була. Анда укыганда һәм җәмәгать эшләрендә актив катнашуы өчен юллама белән чит җирләргә түгел, ә туган төбәге янәшәсендәге авылга районыбызга эшкә җибәрәләр. Төп белгечлеге буенча ул Олы Елга мәктәбендә физика фәнен укыта. Балаларны ярата, алар белән төрле кызыклы, мавыктыргыч чаралар алып бара. Хәтта театр түгәрәкләренә кадәр оештырып җибәрә. Әнә шулай җаны-тәне белән балаларга белем биреп йөргәндә аңа авылның уңган егете Зөфәрнең күзе төшә һәм озак та үтми гаилә корып җибәрәләр. Уртак тырышлык, бердәм көч белән менә дигән яңа йорт җиткезеп керәләр. Гаиләдә дә, хезмәтендә дә өлгерә ул. Җитезлеген, оештыру осталыгын күреп аны мәктәп директоры урынбасары итеп билгелиләр. Эш сөючән, инициативалы белгеч биредә дә озак тоткарланмый. Авылда яңа төзелгән балалар бакчасына мөдир итеп куялар аны. Яшь җитәкче монда да сер бирми, җиң сызганып эшкә керешә. Шактый зур һәм нәтиҗәле чаралар оештыра. Үз тирәсенә балаларны ярата торган көчле белгечләрне туплап, сабыйларны заман рухында тәрбияләп мәктәпкә әзерләүгә керешә. Һәрвакыт үз эшен югары дәрәҗәгә җиткерә, аны камилләштерергә омтыла. Әнә шуңа бу коллектив бүген район күләмендә иң яхшылардан исәпләнә дә инде. Эш сөйгәнне-ил сөяр, дип хак әйтә халык. Авыл кешеләре, коллективы һәм район җитәкчеләре арасында да аның абруе зур. Күп мәртәбәләр Мактау кәгазьләре, дипломнар һәм күкрәк билгеләре белән бүләкләнүе дә шуның ачык мисалы. Киләчәктә дә аңа авыр, әмма җаваплы хезмәтендә җиңеллек, уңышлар гына юлдаш булсын иде.
