Рус Әшнәге авылында мемориаль такта кую тантанасы үтте(ФОТО)

Шушы көннәрдә генә шундый чараларның берсе Рус Әшнәге мәктәбендә узды. Ул шушы авылда туып үскән, Советлар Союзы Герое Александр Меркушевка мемориаль такта куюга багышланган иде. Тантананы Рус Әшнәге авыл җирлеге башлыгы Таһир Садретдинов ачып җибәрде. Ул бүгенгесе көнне авылда биш сугыш ветераны калуы, аларның барысының да торак шартлары яхшыртылуы хакында сөйләде. Ә мемориаль тактаны ачу хокукын авыр сугыш елларында тылда хезмәт куйган Виктор Елисеев белән Надежда Сведущевага бирделәр.

Аннан, тамаша кылган халык Бөек Ватан сугышында башларын салган якташларыбызны бер минутлык тынлык белән искә алдылар. Авыл җирендә яшәүче сугыш ветераннары һәм тыл батырларына биредә ел әйләнәсе зур хөрмәт күрсәтелә. Бүгенгесе көнне аларның күбесе чыгып йөри алмаганлыктан, ярдәмгә мохтаҗлары да игътибардан читтә калмыйлар.

-Мәктәп коллективы андыйларга карата даими шефлык ярдәме оештыра,-дип башлады үз чыгышын мәктәп директоры Рөстәм Вәгыйзов. Үз чыгышында ул соңгы елларда балаларга патриотик тәрбия бирүнең дә нык активлашуы хакында сөйләде.

Патриотик тәрбия дигәннән, район мәгариф бүлеге башлыгы Илсур Садыйков мәктәпләрдә күрелгән чараларның шуңа нигезләнгәнлекләрен ассызыклады. Мәктәп бинасына мемориаль такта куелу һәркемгә зур җаваплык өсти. Ул формаль гамәл генә булырга тиеш түгел. Герой укыган мәктәптә бу аеруча бер баш югарыррак дәрәҗә алырга бурычлы,-диде ул чыгышында.

Район хәрби комиссары урынбасары Илфат Закиров үз чыгышында ун герое булган район белән горурланырга чакырды. Бу уңайдан ул районыбызда әле тагын берничә кешенең сугыш еллары чорында Советлар Союзы Герое исеменә тәкъдим ителүләре хакында белдерде. Боларның барысы да документлар белән расланган. Бүгенгесе көнне андый батыр йөрәкле каһарманнарыбыз турында мәгълүматлар туплау эшләре башланган.

Монда билгеле инде укучыларыбыз да актив эш җәелдереп җибәрергә бурычлылар- диде ул. Кем белә, әле киләчәктә дә якташ геройларыбызның исеме тагын да тулыланып китәр. Тик шунысын онытмыйк, тәкъдим ителүләре үзе генә дә якташларыбызның олы батырлыгы хакында сөйлидер.

Идрис Аметов.

Фото авторныкы.