Авыл офыклары
  • Рус Тат
  • Фермер Рафаэль Шәфыйковның авыл хуҗалыгында хезмәт куюына тиздән утыз ел тула

    Мәм. Каз. Чаллы авылында эшләүче фермер Рафаэль Шәфыйковның авыл хуҗалыгында хезмәт куюына тиздән утыз ел тула.

    Мәктәпне тәмамлагач ул Чистай авыл хуҗалыгы техникумына юл тота. Аны уңышлы төстә тәмамлап кайткач хуҗалыкта тракторчы, гараж мөдире, механик, баш инженер вазыйфаларын башкара. Нәкъ шул елларда, көйле генә эшләгән хуҗалыклар яңа заман таләпләренә яраклаша башлагач, егет үзенең белемен күтәрү максатыннан Казан авыл хуҗалыгы институтына укырга керә. Күмәк хуҗалыклар юкка чыгып, алар урынына авылларда фермерлык хуҗалыклары оештырыла башлагач 47 гектар җир алып "Марат" исемле крестьян-фермерлык хуҗалыгын ачып җибәрә ул. Нәкъ менә шул вакытта аңа алган югары белеме ярап куя да инде. Чәчү әйләнешен билгеләргә, туфрак эшкәрткәндә һәм чәчкәндә нинди маркалы агрегатлар кулланырга, үсемлекләрне корткыч бөҗәкләрдән саклау чаралары хакында чит кешедән киңәш сорап аптыратасы да юк. Барысын да үзе хәл итә. Бүгенге көндә төбәгендә ышанычлы басып торучы хуҗалыкларның берсе аныкы.Техника утарын да елдан-ел яңартырга тырыша, производствосын ныгыта. Бүгенгесе көнне авылда 63 кешенең 320 гектар пай җирен эшкәртә ул. Файдаланган җир өчен һәркемгә сыйфатлы ашлыгын бирә, җитәрлек күләмдә печән, саламы белән тәэмин итә. Аның кул астында бүген 3 трактор, 1 ДОН комбайны, ГАЗ-53 автомашинасы, чәчү, урып-җыю, терлек азыгы хәстәрләү өчен кирәкле барлык җайланма, агрегатлары бар, алар иртәгә үк язгы кыр эшләренә керешерлек хәлгә китерелгән. Үз хезмәтенең уңай нәтиҗәсе дә күз алдында. Соңгы елларда банклардан кредитлар алмыйча гына кыр эшләрен башкарып чыгарга гадәтләнгән. Ашлама, ягулык, чәчүлек орлык запасын инде күптән хәстәрләгән. Кыш айларында фермер үзе яшәгән авыл урамнарын кардан чистартырга да булыша. Бу эштә ул 2014 нче елда лизингка алынган МТЗ-1221 тракторын файдаланган. Кешегә изгелек эшләсәң ул кайчан да булса үзеңә әйләнеп кайта, дигән әйтемдә хаклык бар күрәмсең. Узган ел республика фермерлары арасында аның 400 мең сум грант отуы да бик ярап куйган. Яңа печән пресслау җайланмасы кайтарган.
    Рафаэль бүген авылда тормыш иптәше Рәмзия белән күпләрне сокландырып, балаларын эшкә өйрәтеп гомер итәләр. Шәхси хуҗалыкларында бергәләшеп алар һәр елда диярлек дистәләгән баш терлекләр асрыйлар, кош-кортлар үстерәләр. Иң куанычлысы, улларын да үз янәшәләренә тартырга тырышалар. Олы улы Марат шәһәрдә югары белем алып эшкә урнашса да, әти-әниләренә еш булышырга кайтып тора. Икенче улы Марсель авыл хуҗалыгы техникумында белем ала. Кызы Ләйлә әнисенең төп ярдәмчесенә әйләнгән. Җәй айларында алар кыр эшләрендә катнашалар, суктырылган ашлыкны чистартып урнаштырырга, саклауга куярга ярдәм итәләр. Үз бакчаларында да бергәләшеп яшелчә, җиләк-җимеш үстереп кышка бай запас әзерлиләр. Шәфыйковлар гаиләсе әнә шулай авыл җирен ямьгә күмеп, үз көннәрен үзләре күреп, үзара ярдәмләшеп, матур, мул тормышта яшиләр.
    Идрис Аметов.
    Автор фотосы

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: