Династия дәвамчылары

Иң куандырганы, бу терлекчеләр икесе дә балачактан ук әти-әниләре хезмәтен үз күреп, аларга булышып үскәннәр. Шуңа бүген дә аларның эшен уңышлы төстә дәвам иттерәләр. Виталий Котлы Бөкәш мәктәбенә йөреп 8 нче сыйныфны тәмамлагач район үзәгендәге һөнәри училищеда белем ала. Авыл җирендә яшәүче ир-егетләр өчен аеруча кирәкле булган киң профильле механизатор белгечлеген алып, тракторда җир эшкәртә, иген игә. ДТ-75, Т-150 кебек куәтле тракторларны йөртә. Әмма әтисе Александр дәдәй белән әнисе Мария түти хезмәтен дәвам иттерү нияте белән егет терлекчелеккә килә. Тормыш иптәше Нина да уңган хезмәткәр. Ул күрше Теләче районында ишле гаиләдә үскән. Виталий кебек кечкенәдән фермада эшләүче әти-әниләренә булышкан. Ә урта белем алгач, аларның хезмәтен дәвам иттергән. Бүген Новиковлар үз эшләрен белеп, җиренә җиткереп башкаралар. Алар шәхси хуҗалыкларында да терлекләрне күп асрыйлар. Коллектив маяклары Новиковлар ике кыз үстерәләр. Кем белә, бәлки алар да әти-әниләренең данлы эшләрен киләчәктә дәвам иттерүчеләр булырлар.