Ул - сәхнә кешесе

Гомеренең күп өлешен Владимир Валентинович Банницын сәхнәдә концерт, тематик программалар һәм постановкалар алып баручы сыйфатында эшләүгә багышлый. Ул сәхнә иҗаты белән Балык Бистәсе һөнәри-техник училищесында укыганда шөгыльләнә башлый. Геннадий Дмитриевич Евдокимов җитәкчелегендәге вокаль-инструменталь ансамбль составында чыгыш ясый. 1982 елда Владимир Казан дәүләт мәдәният институтына укырга керә, ә 1988 елда укуын «мәдәни-агарту эше» белгечлеге буенча тәмамлый (1982-1984 елларда Совет Армиясе сафларында хезмәт итә). Ульяновск шәһәренә «Яшьләр» мәдәният һәм ял паркының сәнгать җитәкчесе вазифасына эшкә килә, анда массакүләм һәм ял чаралары оештыра. 1989 елда, район мәдәният бүлеге җитәкчесе Анатолий Автономов инициативасы белән, Балык Бистәсе районы мәдәният йорты директоры вазифасына чакырыла. Шул ук елда Владимир Банницын «Камские зори» вокаль ансамбленең иҗади коллективында чыгыш ясый башлый, ул бер елдан соң «Халык коллективы» исемен ала. Коллективта катнашучылар белән бергә Владимир конкурсларда катнашып төрле дәрәҗәдәге Дипломнарга ия була.
 1992 елдан район мәдәният йортының өлкән методисты вазифасын үти башлый. Бу вазифада эшләгәндә ул методик материалларны системалаштыра һәм методик әдәбият картотекасын яңарта, Балык Бистәсе районының барлык авыл мәдәният йортларында клуб формированиеләрен паспортлаштыра. «Хәтер дулкыннары буенча» (районның иҗтимагый һәм сәяси эшлеклеләре турында чаралар циклы), «Буыннар диалоглары» (ветераннарның яшьләр белән очрашулары), «Бу көннәрдә дан тынмаячак» һәм «Безнең төбәк Геройлары» (районда туган атаклы сугышчылар турында портретлар) иҗтимагый - сәяси һәм тематик программаларның күпсанлы сценарийларын һәм методик эшләнмәләрен эшли. 2000 елда Владимир Валентинович Татарстан Республикасы халыкларының бәйрәмнәре һәм йолалары буенча әйдәп баручы методист  вазифасына күчерелә. Ул халык иҗаты смотр-конкурсларын һәм фестивальләрен үткәрү буенча нигезләмәләр һәм тәкъдимнәр, шулай ук район территориясендә яшәүче халыкларның традицион бәйрәмнәре - «Масленица», «Нәүрүз», «Троица», «Сабантуй», «Каз өмәсе», «Играй гармонь» сценарийларын эшли. Ул халыкның барлык яшь категорияләренең ялын оештыруга аерым игътибар бирә, концерт һәм тематик программалар, ял кичәләре авторларының берсе һәм алып баручысы булып тора. 
Һөнәри лицейның «Алтын балык» КВН командасы белән хезмәттәшлек итә, аларның профтех белем бирү системасының район һәм республика КВН уеннары җиңүчесе булуында өлеше зур. Балык Бистәсе гимназиясе базасында «Безнең ишегалды малайлары» КВН командасын оештыра. 2004 елда республиканың гомуми белем бирү мәктәпләренең КВН командаларының зона республика смотрында призер була.
 Эш нәтиҗәләре буенча 2001 һәм 2002 елларда «Иң яхшы клуб хезмәткәре» район конкурсында җиңүче була, ә 2003 елда Татарстан Республикасы Мәдәният министрлыгының Мактау грамотасы белән бүләкләнә.
Җәмәгать лидеры буларак 12 ел дәвамында районның клуб хезмәткәрләренең профсоюз оешмасын җитәкли. Мәдәни-агарту эше өлкәсендәге актив һәм нәтиҗәле эше өчен, 2005 елның 30 августында, Россия Федерациясе Президенты Указы нигезендә «Казанның 1000 еллыгы истәлегенә» медале белән бүләкләнә.
2005-2008 елларда Владимир Банницын Балык Бистәсе муниципаль районы башлыгы Аппараты җитәкчесе вазифасында эшли. Эшчәнлеген оешмалар, предприятиеләр, иҗтимагый структуралар белән координацияли, районда иҗтимагый-сәяси һәм кадрлар эше өчен җавап бирә. Владимир Валентинович район оешуның 80 еллыгына багышланган бәйрәм чараларын оештыруда, Татарстан Республикасының эре шәһәрләрендә яшәүче якташларыбызның очрашуында бик актив катнашты,  «Кама таңнары» халык вокаль ансамбле составында Бөтенроссия конкурсларында катнашты.
2008 елда Владимир Валентинович Ф.Әхмәдиев исемендәге Балалар сәнгать мәктәбенә театр сәнгате буенча педагог сыйфатында укытучылык эшенә күчә. 2009 елда театр сәнгате бүлеген ача, ә 2012 елда директор урынбасары вазифасына билгеләнә, укыту-тәрбия эше буенча педагогик коллективның эшен планлаштыру, укытучыларны аттестацияләү, укучылар белән сыйныфтан тыш тәрбия эшен оештыру, мәктәп тарафыннан үткәрелә торган мәдәни-массакүләм чараларны оештыру өчен җаваплы була. Ул солист, концертлар, кичәләр, очрашулар алып бара.
Владимир Валентинович Татарстан Республикасы Халыклары ассамблеясе караган «Рус милли-мәдәни берләшмәсе» төбәк иҗтимагый оешмасы составына кергән «Балык Бистәсе рус җәмгыяте» җирле иҗтимагый оешмасының җитәкчесе булып тора.

Дәвамын «Авыл офыклары» газетасы битләрендә укый аласыз.

Светлана Кутлина.